鄱阳湖野生美味——蔾蒿

admin

鄱阳湖蔾蒿——王志红 笔
鄱阳湖蔾蒿是鄱阳湖特有个野生草类，上半年满满个湖水，一到下半年湖水自然退去，丘会长出牛筋草，蔾蒿等，一直到第二年春，在鄱阳湖涨水之前，鄱阳湖畔个勤劳个宁们，丘会到鄱阳湖个草坪上打草，讨野菜，蔾蒿等，打来草是用来田地做肥料；鄱阳湖个蔾蒿早些年是讨来喂猪恰个，现在北晓得什么宁什么时候搬上子餐桌，而且是味道奇美个一道菜，在鄱阳一下传开，传遍江西，浙江等，个朝菜市场也有卖，都要7-8元一斤，贵个时候10来元一斤，还都是菜地栽种个为多，味道也北如鄱阳湖野生个味道重。
相传，早在宋景祐三年（1036年）间，范仲淹任饶州知州，范知州个廉名太家也都敬重，其每天坚持自己定下个伙食标准用膳，伙食实在谈北上好。个年春天，鄱阳宁好客，本地厨师把自己妻子采来个黎篱嫩茎,掐成一段段,切上脆制个腊肉，炒来一太盘给范太宁享用。岂知范仲淹津津乐道,手北停箸。
用过餐后,范仲淹叫来厨师，打听此菜个来历，厨师一五一十从头到尾禀报完毕。范仲淹一听，连连称赞说:"好菜好菜,若是辣一点更好。"后来厨师果真依据范太宁指点下料，此菜居然成了时鲜，并且传到寻常百姓宁家，成为鄱阳个一道风味名菜。